रामजी बैठे सिंहासन (सोहर)

              आजु अवध बड़ी भीर तो, नौबत बाजय हो -२

सखी लौटे हैं करि बनबास, राम सीता लछिमन हो

आरति थाल सजावहिं, तव माता कौसिल्या रानी हो -२

सखी छज्जे पे चढि के निहारें, ललन कहां पहुंचे हैं हो

आवत लख लख भीर, राम नाहीं लौकइं हो -२

सखी अगवा से सब हटि जाव, ललन मुख देखहुं हो

चौदह बरस कइसे बीते, तुमहिं का बताववं हो -२

सखी दिन तो कटे कटि जाय, रैन लागे बैरन हो

आजु नगर मोरा बिहंसय, भवन मोरा हुलसय हो -२

सखि राजा दसरथ बिनु सून, हृदय मोरा व्याकुल हो

अवधनगर केरी सखियां, कौसिल्या समुझावयँ हो -२

रानी धीर धरहु मन आजु, अवध दिन लौटे हैं हो

हिरदय से लागीं सुमित्रा रानी, चरनन कैकेई रानी हो -२

दीदी मोरी मती गई बौराई, ललन बन भेजिवं हो

नीर बहावें तीनिव रानी, तव सरजू बहन लागीं हो -२

सखि सरजू ने दीन्हा वरदान, तिलक चढ़य रघुवर हो

रघुवर बैठे सिंहासन, हनुमत भुइयां गहे हो -२

सखि भरत, सत्रोहन औ लछिमन, भइया के बगल ठाढ़े हो

ऋसिमुनि तिलक लगावइं, संखधुनि बाजइ हो -२

सखि होवन लागे मंगलचार, कौसिल्या जियरा हुलसय हो

**जिज्ञासा सिंह**

 २ का मतलब -दोबारा

नौबत: वाद्ययंत्र

लौकइं: दिखना

आवत: आना

बताववं: बताना

बैरन: बैरी, दुश्मन

हुलसय: खुशी

हिरदय,जियरा: हृदय

भुइयां: ज़मीन

भेजिवं: भेजना